葉公館

营业中

休息中

今日喺葵兴上堂 ，专登拉埋honey来附近揾食 ，见到开饭网介绍呢度啲套餐孖宝抵食又好食， 所以嚟试下。见到个门面都几靓呀，原来呢度唔单止有粤菜，仲有川京菜食， 上到一楼餐厅， 餐厅好大 ，菜式选择好多， 店员姐姐都好有礼貌， 先开茶再送上小食， 碟小食系四季豆云耳， 小小辣， 都几好味 ，醒胃又开胃。 我哋叫咗个孖宝餐，再加一碟手撕包菜， 孖宝餐系叉烧加蒸石斑鱼， 碟叉烧厚切上， 肥瘦兼备， 烧得香甜松软 ，就算瘦肉部分一啲都唔柴， 嫩滑美味， 比得上名店嘅叉烧出品， 非常值得推荐。 跟住到啲碟蒸石斑上枱，虽然唔大条，但系肯定系好新鲜，鱼肉系雪白嘅， 食落又嫩又滑 ，加埋啲蒸鱼豉油，较得好好味 ，食到舐舐脷 ，停唔到口， 骨都选到干干净净。最后系碟手撕包菜 ，好大一碟， 四个人都够食， 可惜辣咗少少 ，下次来记得叫走辣， 广东人食辣系渣啲。食完饭仲有海带绿豆糖水送，煲得超正， 唔系好甜 ，啲绿豆仲系大大粒，煲到啱啱好唔会太烂，有少少豆咬口，食得好过瘾好满足。 食饭食到七点几都已经差不多坐满人，可见呢度好受欢迎 ，非常之热闹，如果系周末肯定爆棚。