靠得住粥麵小館 (形點 II)

营业中

休息中

今日入咗元朗揾朋友行街,喺美孚搭西铁入元朗都系十几分钟真系好方便,行完街喺附近揾啲嘢食下,喺形点商场见到一间平时都有帮衬开其他分店嘅港式粥品店。靠得住粥面小馆 餐厅地方阔落,座位嘅空间感好足够,装修亦都好整洁。喺度食嘢感觉真系好舒适。前菜酸萝卜,麻辣小黄瓜,萝卜酸酸甜甜味道清新,食完真系好开胃。麻辣小黄瓜,唔算太辣,口感爽甜。东江盐焗鸡半只 ,东江鸡鸡皮好香滑,鸡肉肉质嫩滑,鸡皮有少少咸香,点少少沙姜汁味道更加有层次,食得出鸡系好新鲜。鱼汤海味粉丝杂菜煲,个汤味道香浓清甜,吸收咗瑶柱,冬菇,鱼,杂菜嘅精华,我个人就好钟意饮呢个汤,贪佢够清甜。心肝宝贝粥,粥底好绵,好滑。猪润厚切食落去好有口感,爽口香甜,咁香甜嘅粥喺出面真系好难食到。白灼猪腰猪润,简简单单食到原汁原味,加少少辣椒豉油令到猪膶味道更加有层次,猪润灼到啱啱好食落去仲系好爽口,加埋旁边嘅葱丝花生一齐食,无论味道同口感层次都好丰富,个人觉得呢个系必食嘅推介。