Just Eat (已結業)

前几日生日，男朋友知我钟意食越南菜，带左我去西环的Just eat食嘢，个到都叫近西营盘地铁站，行去正街的扶手电梯落去就到，好方便，好彩我地早到唔系都无乜位坐。我哋叫左一碟鸡丝扎肉虾头油炒饭、蕃茄浓汤海鲜金边粉、丝网春卷、越南冻咖啡奶、冻柑桔梳打。鸡丝扎肉炒饭材料都几足，而且粒粒分明，又唔话觉得佢炒得过火，所以不错。我觉得最正系蕃茄浓汤海鲜金边粉，一来我好钟意蕃茄汤底，二来连男朋友不嬲都唔好蕃茄汤都话好味，虾味好浓，系咁饮，除了海鲜仲有啲肉碎，层次感丰富。丝网春卷脆卜卜，包住生菜食，令你唔会觉得好内疚，而且好好味，就算摆耐左都无问题，唔会腍左。男朋友就系饮冻咖啡奶，佢好钟意呢杯饮品，我就觉得味道似拖肥，咖啡味都出，但相对奶味比较重。柑桔梳打好正，柑桔味都几出，系唔咸的咸柑桔，少少微酸好开胃，清新得来带多一点味道。