La Serene Caffè

营业中

休息中

今日妹子相约收工去逛街，行咗入崇光以为睇化妆品，原来佢想买支靓啲嘅笔啫，佢带我行去YSL旁边搭䢂，直接到达位于11楼嘅书店，楼层有个卖原子笔嘅专柜，买到心头好就顺便食埋饭。近期都好少到崇光逛街，刚发现呢间餐厅景观几正，店内木系装潢雅致，感觉闲逸舒适。侍应殷勤送上餐牌同开水，我食完下午茶无耐未肚饿，叫咗一个主菜，一个天使面，主菜加$45配埋餐汤+咖啡 。餐汤系意大利菜汤，妹子话菜汤香浓好饮。面包温暖松软有牛油香。煎银雪鱼柳摆盘精致，配菜新鲜，种类丰富，有椰菜花、西兰花、翡翠豆苗、翠玉瓜、四季豆、红萝卜、薯仔。银雪鱼皮脆肉滑，油脂丰富甘香，点埋柠檬柚子醋汁，好味又解腻，正！蒜香带子黑鱼子天使面天使面卖相非常吸引，特别系面头嘅黑鱼子。除咗天使面同黑鱼籽，仲有带子、新鲜蘑菇、洋葱、翡翠豆苗、车厘茄。带子两面轻煎过，肉质保持爽口鲜甜，天使面爽身又幼滑，配埋黑鱼子嘅咸香，鲜香惹味，好食呀。唔少得要叫一客甜品，日式芝士蛋糕系冻食嚟，芝味香浓，口感不错，伴碟嘅果仁朱古力都好食。莱斯金牌咖啡，啡味香浓，口感顺滑。好开心发掘到一个见客好地方。