金滿膳燒味餐室 (已結業)

难得周末，梗系要约下朋友食下串烧，吹下水联络下感情啦。我哋两个人太肚饿，所以一开始嗌咗好多串烧，估唔到佢啲串烧份量咁多，好彩味道上乘，唔系真系食唔晒。首先到嘅系蒜蓉烧茄子，远远已经闻到蒜蓉嘅香味。茄子嘅份量一啲都唔细，佢烧嘅火候啱啱好，无出现皮烧窿嘅情况，蒜蓉嘅香味夹埋油香，茄子绵密嘅口感真系可以令人食到停唔到口。之后我哋嗌咗烧五花腩同鸡肾串，16蚊一串，好抵食。五花腩肥瘦适宜，火候控制得好好，一啲都唔柴，咬落口啲汁水爆晒出黎，好香口，回味无穷。烧鸡肾品质都唔差，无腥味，烟韧又有咬口，值得一试。至于大扇贝108蚊有3只，咁大只嘅扇贝自己去买都唔平，佢哋嘅扇贝唔单抵食，仲keep到扇贝本身嘅鲜嫩多汁，而且大大啖好满足。最后讲埋锡纸焗娃娃菜38蚊一份，份量依旧好多，而且无因为烧烤嘅做法，改变佢原本清甜嘅味道。口感方面系仲有少少脆，而且好索汤汁，真系健康又美味，真心推介。