鹿鳴春飯店 (已結業)

作为有名嘅旧式中菜馆,呢度既装修格局虽然比较古老,但系一啲都唔残旧.钟意怀旧嘅一定要来.侍应都有番咁上下年纪,一律恤衫西裤打煲呔,都系有学识嘅样,行出街会畀人觉得系银行经理.一坐低侍应就畀条热毛巾你抹手.食午饭咋㖞,而家已经好少有餐厅提供咁嘅服务.小食系花生萝卜粒,花生系湿嘅,好爽口,比起好多茶楼既咸脆干花生好好多,起码食得出好浓既花生味.出菜唔快,都要等十几分钟.京烧羊肉先到,外面一层薄薄既脆皮,里面嘅羊肉多汁到咇出嚟.羊肉上枱时仲会有碗酱汁,建议唔需要点汁,羊肉本身已经好好味,无谓用汁盖过羊肉本身既美味.记住要趁热食,我专登留低一件食完饭食,谂住可以走𠮶阵时齿颊留香,但食完饭佢羊肉已经干晒喇,呢个时候就算点乜汁都够唔返.回锅肉用青红椒加京葱爆炒,回锅肉本身唔在讲,全部配菜都非常入味.回锅肉食落唔肥,油份都唔会过多,味道浓得嚟同配菜好夹,用来送饭一流!撑得著自然淘汰既果然都系好嘢.