陳漢記 (已結業)

廿岁已识老板教头，以前晚晚打 snooker、落吧劈酒再黎食宵夜，玩得劲开心。间中老板、粥佬、肠粉佬、煲仔饭阿正，仲有楼面奄仔、阿七、阿肥、阿细，收工拉闸一齐劈酒猜梅到天光七八点，劲癫 ﹗有时又会一齐落酒吧、猜梅、掟飞镖，非常开心。依家多左好多新面孔，舖位又比以前大左一倍，但依家各散东西了，我都好少黎帮添咯。出品都保持水准，肠粉、粉面、煲仔食都满意啦 ﹗ 鱼蛋河加腩汁，潮州鱼蛋大路既质数，味浓又爽口，合格啦，始终招牌菜唔系鱼蛋。牛坑腩捞面走葱，都唔知几多年无黎帮衬喇 ﹗以前无分坑腩唔坑腩，都系牛腩啦。味道同质感比当年进步多倍，好好味 ﹗炆得软棉又入味，味道真系好香浓，口感松化，正噃 ﹗猪润肠粉，几十年都系即拉肠粉，新鲜热辣，米浆调得完美，蒸既火喉又刚好，质感又滑又嫩又棉 ﹗猪润丝蒸得刚刚好，热辣辣，爽口又够滑 ﹗招牌菜即拉肠粉绝对稳阵食得过 ﹗仲有叉肠、牛肠、虾肠同样美味 ﹗