源記喳咋 (已結業)

4月13日, 食完日本野, 又未到时间睇戏, 经过源记个甜品胃又发作, 入嚟食个糖水先~::: 渣咋 ::: $17话明系招牌㖞无理由唔试! 冻渣咋够晒冰凉~ 下足红豆、绿豆、眉豆、红腰豆、三角豆、西米等, 唔少得煲得又粉又腍味道香甜嘅芋头同大量重手椰汁花奶! 豆料足, 煲得软腍, 咬落充满软绵口感~ 除咗豆香甜味之余又渗煮淡淡椰香, 好味! 不过因为真系太足料, 又豆又芋头又椰奶又花奶… 食半碗都开始有d腻~ ::: 芝麻糊 ::: $15芝麻糊比一般嘅黑, 但系味道绝对唔逊色, 除咗闻落有非常香嘅黑芝麻香, 食落非常绵绵嘅感觉, 一流! 唔马虎嘅用料, 啖啖都有芝麻香, 亦都唔系沟水沟到稀晒, 甜得嚟又够清, 冇呛喉感, 够绵够杰嘅质地, 咁嘅价钱真系超水准! 但系可能佢真系好够杰, 食一碗都真系几顶胃~呢d传统中式糖水店已经所余无几, 亦都好难喺而家嘅新派糖水店食到咁认真嘅中式糖水~ 加油努力!