漢興茶檔

营业中

休息中

今日又上新嘢，不过同事讲定要有心理准备，要排队等位，兼食物要得好耐！因为即叫即做，搅笑系要好似以前茶楼揾位咁企响张枱旁边，好彩去到有人刚走刚走，居然5分钟有位，而另一搅笑，系未有位就可以叫定食物！地方残旧，墙身剥落，我坐嘅位置仲要地面不平，不过大家都唔介意，我坐低之后，出面已经出现人龙，落单阿姐好急好燥，落单好乱，不过又唔系无礼貌，只系急啲啫，佢都会提我们叫咸牛蛋饼要等30分钟！最后落好单，食物唔按次序出场！热柠茶：玻璃有耳杯比较少见，够热，茶底够浓唔涩！出前一丁：平常出街食嘅丁面，好多都唔啱心水，呢间系少有合晒我心意，面唔会好淋，少弹牙，汤底够浓，正！等多10分钟，主角终于出场，咸牛蛋饼：而家少咗茶餐厅用咸牛做早餐！卖相好特别，像一个蛋糕，蛋饼里面好多咸牛肉，味道咸香，好松，够热，好味！店内好似打仗，店员上菜好像街市叫卖咁！不过客人都好好，一食好就走（都唔坐得耐），一个面都唔贵，但加一个𩠌（鸡翼式猪扒）已经好贵，因为无套餐！全部散叫！