留家廚房

营业中

休息中

光顾留家厨房，一定要有准备，由于全部都系心机菜，所以订位嘅时候已经订埋菜式。镇店之宝留家烟熏鸡，据称用足 100 日大嘅靓鸡先以卤汁浸熟，再用片糖，甘蔗同干玫瑰花蕾烟熏而成，平时最钟意食烟熏食物嘅我当然觉得劲正，一放入口就闻到朕烟熏香味🤤。另一样我觉得好好食嘅系留家叉烧，据称系采用较为罕有嘅梅头咀，并以廖孖记酱料腌制，即叫即烧，肥瘦均匀，蜜汁香甜肉味浓，仲有我最钟意嘅㶶边，💯分。虾子柚皮平时好少食，今次一食又系爱上，两大块柚皮炆得好腍，差啲入口即溶，据闻系用金华火腿鲜鸡汤炆，难怪咁入味；芡汁口感偏稠，入面有我最钟意嘅虾籽，好正。冬瓜盅又系我嘅至爱，用料丰富，汤汁鲜甜，饮一碗其实唔系好够喉😂。梅菜蒸芥胆又系第一次食，重点系咸香嘅梅菜，芥胆反而变咗配角。最后系制作劲需时嘅太史戈渣，呢个原本系北京街头小吃，主要以上汤，鸡蛋同粟粉制成，食落味道有啲似玉子豆腐，几特别，但唔算得上好好食。值得一提系呢度嘅白饭，同伴话系用好贵嘅日本电饭煲煮，特别好味，我唔系饭控，其实唔太食得出个分别😂。