Masala Hut & Cafe (已結業)

呢间印度餐厅几抵食，星期日中午去食lunch buffet $130，有多种前菜沙律、咖喱、印度薄饼、印度特色食物任食，仲包一杯嘢饮添。首先我梗系食一轮沙律前菜，有一个脆米波波可以装一啲薯仔沙律入出再倒入一啲特色酱汁，几有特色几开胃。食咗一阵好快店员就送上naan同埋一个卷饼。卷饼系即场整嘅，里面有啲好似咖喱薯仔嘅馅，饼皮咸咸地有啲胡椒香，几好食。naan就紧系用嚟点咖喱汁食啦，出面最少有5/6款咖喱，各有特色。其中有一款叫Rogan Josh，羊肉用creamy嘅蕃茄咖喱汁炆煮得好入味，肉质柔软，肉味香浓，用naan点汁食好正。另外仲有鸡肉嘅chicken tikka同埋kadhai chicken，呢两款咖喱辣度都啱啱好，香浓惹味。不得不提呢度嘅炸鱼几唔错，炸粉薄薄，香口脆脆嘅外层包住大大件嫩嫩鱼肉，配上各种咖喱汁食又系另一种滋味。总括来讲，呢个自助午餐可以试到唔同嘅特色印度咖喱，味道亦都唔错，性价比几高。最后慢慢饮埋一杯冻饮，食咗满足嘅一餐。