醉辣鮮 (天空之城)

营业中

休息中

经朋友介绍嚟到呢间专食粥底蒸海鲜嘅餐厅，交通都算方便，喺锦上路转巴士几分钟就到。佢有几款唔同嘅海鲜餐，今次我哋叫咗肉蟹放题海鲜餐，套餐本身定量嘅有虫草花蒸鸡、珍宝蟹柳、小笼包、生蚝、扇贝、鲍鱼同海虾。然之后肉蟹、各式蚬类同蔬菜就可以任食。嗌完餐就即刻可以出去自己”捉”海鲜！门口有几个大大嘅水缸，入面装满各种生猛嘅海鲜！根据嗌嘅套餐，夹番相对份量嘅海鲜然后就交俾店员进行清洗同准备，系一个唔错嘅新体验，保证海鲜新鲜生猛。返到座位就已经见到店员安排好蒸鸡件同老火汤，鸡件都算滑，而家用咗红枣杞子同虫草花，非常入味。食到咁上下店员就将我哋嘅海鲜送到，仲好贴心咁俾咗一张有每种食材所需蒸煮嘅时间嘅表我哋，咁就唔会蒸唔熟或者蒸过龙。海鲜全部都好新鲜，尤其系鲍鱼口感爽弹，肉蟹蟹肉鲜嫩食落鲜甜，扇贝够大粒，仲可以根据个人喜好，加上粉丝同蒜油！食到最后可以食埋个南瓜排骨粥底，蒸海鲜时嘅汁会完全流晒落去，吸收晒所有海鲜嘅精华，特别鲜美，食唔晒仲可以打包返屋企添。饮品方面叫咗大大杯柠檬茶，清凉又解渴。最后有桃胶作为甜品够晒滋润。星期六日仲有驻场嘅Live Band，绝对适合亲朋戚友渡过愉快嘅周末。