MX (中華總商會大廈) (已結業)

食晏放饭食快餐，去咗食MX中环，一心谂住食天使鸡扒饭，排队𠮶阵见到有个自由扒餐，块板可以拣和牛汉堡、鸡扒或者猪扒，跟住再拣火腿、肠仔或者午餐肉，之后再拣汁，再加饭或者意粉$46连嘢饮，总共有36个唔同嘅过关组合。最尾我拣咗和牛汉堡配火腿，配红酒牛肉汁意粉，跟冻奶茶加$3。和牛汉堡比较细块，但厚厚地几好咬口，质素同MOS BURGER和牛汉堡差唔多，口感各有不同，红酒牛肉汁几好味，总括来讲成个餐都唔错，但如果佢可以好似大快活咁，有多啲菜就再好啲。再简单介绍下呢间MX，比较特别嘅系佢系有两层，两层都系有各自嘅收银处同厨房，好少见，卖嘅嘢食大部份嘅都一样，但系有啲系楼下有楼上冇，所以唔赶时间嘅你可以睇下楼上楼下分别有咩食先买。个人比较钟意坐上层，因为有窗口感觉冇咁局促。今日去食嘅时候系星期日，成间舖都坐满菲佣，感觉置身菲律宾，快快食完我就起身。