Plato Cafe & Bistro (吳松街)

家人生日，黎到位于佐敦依间新店食西餐。估唔到未够7点，已经好热闹。因为临近圣诞，餐厅有唔少圣诞装饰，增添咗唔少气氛。我地点咗尊贵二人套餐($498)，再额外加咗鸡胸天使面($128)。套餐嘅是日餐汤系蘑菇汤，好creamy，加上粒粒蘑菇肉就更加有好感。头盘系白酒煮蚬同埋烟三文鱼凯撒沙律。蚬系沙蚬量，重称又肥美多汁。而烟三文砌成一朵花形，卖相一流，沙律非常开胃。主角系炭烧安格斯肉眼牛扒配酒香烧汁，叫咗7成熟，只系有少少血色好啱我依啲怕生嘅人食，肉质比起西冷牛扒更加夹软熟，肉汁好浓。平时点牛扒通常叫黑椒汁，今次嘅酒香烧汁估唔到又几衬牛扒。配菜有烤薯仔、红萝卜、西兰花，令到成个主菜更丰盛。饮品系芒果草莓茶。而鸡胸天使面比想像中份量更多，鸡胸薄薄地一片，一啲都唔鞋厚。天使面系配上三色椒一齐煮，条条分明。最后套餐嘅甜品我要咗朱古力慕丝蛋糕，好明显见到三层馅料，咖啡味好重，而且口感结实。