FLIPPER'S Pop-up (已結業)

几个姊妹都好钟意食疏乎厘班戟，试过咁多间，Flipper’s真系食过回头最多既店。𠮶日系铜锣食完饭想转场食甜品，去到Hysan店先发现原来转左新地址去利园。本身以为系商场入面，揾咗一轮先知原来系利园后面外围嘅地舖。入面整体坐位少左，但都系几光猛同埋阔落。.我地8点左右去到既时候刚好得番单边位，店员见我地三位都礼貌问我地介唔介意坐旁边会快啲有位比到我哋，不过因为我哋系同另外一个朋友庆祝会比较想坐埋一齐，见到我哋可能想等四人枱店员都即刻帮我哋睇吓其他客人用餐情况预计我哋大约需要等几耐，呢个举动几贴心😊我地等左大约十分钟都有位。.因为我哋都有啲饱，所以叫左一个士多啤梨蓝莓香蕉班戟($129)share，佢地既班戟咁深得我地心系因为佢哋做到有空气感得黎食落软绵绵既口感，最重要蛋香味好足，真系加咗好多分，配合埋新鲜嘅水果同好浓奶香味嘅忌廉，无论口感同香味都配合得好好。💬总结食物方面，绝对keep到一贯嘅水准，真系会每隔一排就挂住个班戟，而且呢间新店嘅员工特别有礼貌，座位都阔落，唯一缺点系店舖地点上冇之前咁方便，不过我哋都会再黎帮衬，重会想试埋佢地既柠檬芝士脆糖班戟同熔岩朱古力斑戟🤭