菓之店 (美芳街) (已結業)

今日去葵芳同客倾完嘢，个客话带我去社区会堂附近食芝士捞面，原来系间甜品店。门口放咗个牌，大大只字猪扒芝士捞面$33，仲有雪糕或者糖水送。店内光洁明亮，装饰带点小文青，俾人一种舒服嘅感觉。既然客人推介芝士面，梗系要试试啦，加多条司华力肠都系$39一碟面大家分享，蒜香猪扒大大块炸到表面金黄，内心软腍湿䦞。正呀！司华力肠咬落去个皮脆卜卜，唔会腍啫啫。一定要讲吓个秘制芝士酱汁，唔会好漏，同啲捞面又好夹㖞。糖水拣咗椰汁凉粉，仲加多个鸡翼尖。凉粉个椰汁充满椰皇味，原来系用椰皇水替代清水打椰汁，特别清甜，系用心经营嘅小店呀。鸡翼尖系客人叫嘅，平常都唔会食嘅，基于礼貌就夹一件试试，噢...入口有道好特别嘅味道，微微辣，清清哋嘅感觉，好好食㖞，食唔停呀，卒之食咗一半！嚟到甜品店，叫返个甜品食吓。鲜果皇子系将新鲜水果，全部放响椰皇里面，另上椰皇水椰汁。水果有：西瓜、红肉火龙果、士多啤梨、奇异果、芒果、香蕉、木瓜。全部都好新鲜，加埋特制椰汁，味道好夹又好食！正呀！估唔到小店甜品、捞面都咁好食。