韓家韓國料理 (已結業)

今日返熊猫8点到3点，得𠮶9张单，有啲郁闷，于是想试新嘢。平时成日中韩家嘅单，又劲多人帮衬堂食，应该味道唔错，于是落更就过去食。今次点左芝士杂锦海鲜捞面。芝士味好浓，佢搭左只青口，𠮶种腥味混埋芝士味老实讲系有啲臭臭地，但尚可以接受，入到口，食落就唔系太觉臭，啲面都好食嘅，两只虾同两条蟹柳亦唔错。呢个下午茶餐仲送一杯麦茶，成日饮来饮去都系柠茶柠水菜蜜热朱都真系好闷，饮下麦茶感觉新鲜啲。有啲惊喜嘅反而系个免费泡菜。我一向顶唔顺辣嘢，虽然而家练紧食辣。佢啲泡菜我居然只系觉得少少辣，ok㖞。42蚊一个下午茶，又饱肚，味道又唔差，仲有麦茶饮，唔错唔错。接住我夜晚6至12顺丰更，呢个下午茶我3点半食完，居然可以顶到10点几先开始饿，对于我呢类贫苦劳动阶层，真系好好嘅选择。