鮮入圍煮花膠雞海鮮火鍋

营业中

休息中

今日lunch约左朋友黎呢度食晏，入到去员工好细心，拣左个冇咁大风既位俾我地。坐位都坐得几舒服。上网话呢度个花胶鸡出名，咁我地就直接叫左呢个，然后再叫左牛肉，贡丸，炸响铃，牛骨髓，同埋两款菜。浓厚原只鸡煲花胶汤-我地两个人，所以嗌咗半只鸡就够，啲花胶多到盖晒个鸡，汤真系好浓厚，好好饮，店员仲会过黎帮你剪鸡同花胶，你就实行坐喺度等食。手切安格斯牛肉-碟牛肉好新鲜好靓，就咁食唔使点酱已经好味。炸响铃-个人喜好，我去亲打边炉都会食炸响铃。胡椒猪肚贡丸-呢个贡丸再加胡椒猪肚我都系第一次听，少少胡椒味，几特别。唐生菜鲜嫩尖笋片-菜类都几新鲜，我钟意呢度有啲特别啲既款式例如尖笋片，几爽脆。牛骨髓-而家出面比较少有，同埋都好干净好滑。红枣桂圆茶，杞子雪耳茶-中女要饮热饮，呢度几款热饮都几出色，够晒滋阴养颜。酱料架有沙茶酱系几出色，不过我自己觉得佢汤底够浓，再加牛肉新鲜，所以食原味道都够。