福和雍

营业中

休息中

中环最近新开一间主打手工精致点心嘅茶馆「福和雍」，屋企人见未试过，杂志影出嚟嘅相都唔错，于是我哋又去试吓。叫得做茶馆，提供嘅茶叶都有好多选择，餐牌上对每种茶叶都有详细嘅介绍。茶钱由$40-$120 一位（小童都会计架）。我哋一行四人，就开咗四壶分别$40嘅茶嚟试试。我唔系好识品尝中国茶，不过觉得「凤凰单丛」呢款乌龙茶最啱我口味。因为闻落有花香味，饮后亦有回甘，而且仲有减肥美容同抗衰老功效！点心方面，由前福临门老师傅主理，即叫即做，都颇有水准。我哋叫咗：虾饺、烧卖、芋角、迷你鸡批同埋韭菜炸蟹盒。值得推介嘅系韭菜炸蟹盒，外皮脆卜卜，唔油腻，韭菜同蟹肉嘅比例啱啱好，同时食到蟹肉嘅鲜味同埋韭菜嘅青草味。「福和雍」另一特色系瓷器。餐厅用咗有近百年历史嘅香港老品牌，粤东磁厂嘅出品。瓷器系白色底，绘上蓝色嘅花纹及图案，优雅别致。餐厅各方面都唔错，只不过个地点就有啲奇怪。佢喺娱乐行嘅2楼，走廊开辟出嚟嘅一个地方，个格局同价钱唔成正比。如果餐厅冇咁开阳，冇咁嘈，用餐嘅时候会舒服得多。