都佐 (已結業)

Lunch time啲荃湾揾嘢食，揾到呢间食咖喱嘅餐厅。装修有日式西餐嘅感觉，入到去首先遇到殷勤嘅店员。净系环境同服务已经好加分。坐低之后店员见我行到身水身汗，就主动俾杯冰水我。哇，香港原来仲有态度咁好嘅小店。佢摆低餐牌，顺便介绍佢哋岀名嘅咖哩。咖喱有除咗牛肉鸡肉呢啲大路咖喱之外，仲有野菜咖喱。店员介绍咖喱汁加咗苹果蓉，食落令咖喱无咁浓味，正好适合我因为天气热唔想食太浓味食物嘅胃口。嚟到碟饭就系图入面咁，卖相系靓嘅，不过只系野菜又收成$108一份，令我好期待呢碟饭有几咁神奇。食落系好味嘅，不过咖喱偏辣，盖过咗期待中嘅苹果蓉味道。如果要食环境食服务，呢间绝对推介。如果想食有惊喜嘅日式咖喱，只可以话佢好食过超市买到同连锁店嘅日式咖喱，不过就未必有店员讲到咁惊喜喇。