Chalet (已結業)

自从搬离荃湾区后，才知道开了一间高水准西餐厅，所以一直都冇机会帮衬，今次特别同老婆返荃湾怀旧一下顺便来呢度食嘢。装修好有欧洲feel，有两个用餐区，内厅主要系大枱为主，外厅大部分为双人位，bar 枱设计，方便情侣拍拖倾计。刚巧我哋左右两边都系庆祝生日嘅情侣。晚餐由$288起唔包饮品，但九点前都系happy hour时间，大部份饮品有特价。头盘餐汤系甘笋姜汤，味道甜中带有少辣，几特别的味道。半熟吞拿鱼半三文鱼子，呢个似日式西餐菜式，吞拿鱼肉质鲜甜甘香，生熟程度控制得好好，一口咬落去啲肉有溶化感觉。美式烧烤酱猪肋骨配薯条，份量约为¾ rack，厚身肉质结实，亦唔会太肥，烧得刚刚好，肉好易离骨，烧烤酱唔会太甜，薯条炸得有水准，脆卜卜又甜，唔点茄汁食都够味。法国面包蟹烩意大利饭有惊喜，蟹味好香好浓，原来唔只得两只蟹钳，饭入边都有好多蟹肉一齐煮，啖啖肉连饭一齐食，鲜味十足。套餐甜品水准刚刚合格。