影片
更多
2016-10-21
2802 浏览
早排同旧同事食饭，知道师姐下年初计划去韩国济州，但未定跟团定自由行，话晒小弟2012年都去过一转，手头上都有唔少资料、地图及单张，所以，约咗今晚食饭聚一聚兼交收。佢话耐无食放题，投其所好，就食番餐放题，有时啲嘢就咁「桥」，一喺就成年无食放题，一食时隔两个月又食一次。虽然大井町位处荃湾食厦大鸿辉，好怕嚟呢度因为等电梯烦，不过，餐厅晌商场层，并非大厦层，所以搭扶手电梯上去就可以。餐厅占商厦全层，地方非常之大，而且，最钟意喺间隔成唔同大细嘅卡位，卡位嘅隔板又专登整高啲，变相有个私人空间，唔会受隔离枱咁多骚扰。一入门口转个弯，有个自助区，食开日式放题嘅朋友都知，主要会喺饮品、甜品自由取用专区。由于选择多，都唔可以唔介绍一下。饮品3组大雪柜，韩国、本土嘅樽装、罐装及纸包饮品，款式多达近廿款。不过，今次心水之选唔太多，所以，随意拣几罐饮吓。果汁、热茶想健康少少，另一边位嘅果汁、热茶可能啱你，不过，朋友试过啲果汁，话麻麻哋，因为味道偏甜。沙律、生果自由区除咗饮品，仲会揾到沙律同生果，虽然规模细，但总提供多个选择俾有需要嘅客人。此外，酸姜、八爪鱼仔亦晌度揾到。自助专区嘅甜品就唔介绍住，等临尾先一次过讲
虽然大井町位处荃湾食厦大鸿辉，好怕嚟呢度因为等电梯烦，不过，餐厅晌商场层，并非大厦层，所以搭扶手电梯上去就可以。餐厅占商厦全层，地方非常之大，而且，最钟意喺间隔成唔同大细嘅卡位，卡位嘅隔板又专登整高啲，变相有个私人空间，唔会受隔离枱咁多骚扰。
一入门口转个弯，有个自助区，食开日式放题嘅朋友都知，主要会喺饮品、甜品自由取用专区。由于选择多，都唔可以唔介绍一下。
饮品3组大雪柜，韩国、本土嘅樽装、罐装及纸包饮品，款式多达近廿款。不过，今次心水之选唔太多，所以，随意拣几罐饮吓。
果汁、热茶想健康少少，另一边位嘅果汁、热茶可能啱你，不过，朋友试过啲果汁，话麻麻哋，因为味道偏甜。
沙律、生果自由区除咗饮品，仲会揾到沙律同生果，虽然规模细，但总提供多个选择俾有需要嘅客人。此外，酸姜、八爪鱼仔亦晌度揾到。
自助专区嘅甜品就唔介绍住，等临尾先一次过讲。翻转头介绍放题有咩嘢食，一如时下好多放题店，两大本「档案册」放满分门别类嘅点菜纸，类别包括：前菜、刺身、寿司、卷物、军舰、手卷、炸物、烧物、天妇罗、蒸焗菜式、铁板料理、一品料理、汤面，数一数，足足近百款美食。
顺带一提，墙边贴上wifi密码，方便客人使用。建议有提供免费wifi嘅餐厅，密码就倒不如好似大井町咁大方啲贴晌当眼处，唔使吓吓烦到啲店员问密码。此外，招呼唔错，喺收银态度有啲麻麻，上菜快，而且今晚仲无漏过单添，难得难得！
前菜一口气拣咗4款前菜湿吓口：中华沙律、带子裙边、鱼翅海蜇、冰头渍（三文鱼头软骨），除中华沙律，其他几款都颇有特色，平常都少见，最钟意喺带子裙边，几有食螺肉嘅感觉，烟烟韧韧，三文鱼头软骨口感爽爽脆脆。
刺身刺身都有几多选择，一共有14款，又见到玉子刺身，之前都写过，称得刺身，即喺鱼生，有啲刺身已用牛肉、马肉，但玉子，即喺鸡蛋，不过，玉子刺身唔会俾只生蛋过你，哈哈。
我哋精选拣咗当中6款：三文鱼、吞拿鱼、北寄贝、带子、甜虾、赤虾，砌成一大盆份外好睇，各款刺身睇落光泽新鲜，三文好够油润，北寄贝入口爽甜，带子口感清爽，甜虾鲜甜味突出。反而，吞拿有点怪怪，好似解冻未透咁，而赤虾大就够晒大只，但口感较为胶就唔太合心水。
寿司寿司再细分为几类，其中寿司A款喺一般大路嘢，如吞拿鱼寿司、带子寿司……等等，而B款就几样食材配搭嘅寿司。
相中B款嘅鱼籽酱拌赤虾、花之恋、葱花吞拿鱼腩海胆，真喺唔错，刺身食材本身够新鲜，再以鱼籽酱、蟹籽、葱花、海胆相互配搭，拼发出多层次嘅鲜味。再者，啲寿司饭搓得又比预期好，唔会太实，又唔会太松散，带轻轻醋味。
火炙寿司师姐似乎几钟意食寿司，所以，再嚟又一份火炙系嘅寿司，选择共5款，但点解佢唔拣晒，而只选当中嘅4款呢？原来，都只喺随意而已。
所点嘅4款火炙寿司中：烧和牛寿司拌黄芥末籽、火炙海胆酱玻璃虾、火炙味噌酱蟹棒、火炙三文鱼腩，个人心水喺烧和牛同玻璃虾，前者和牛肉烧到有少少半生熟，嫩滑而富油香，后者海胆嘅甘饴搭上虾嘅爽甜，出奇地和谐平衡。
创作寿司3款以店名命名嘅创作寿司：大、井、町，做成少少波形，点菜纸无话喺乜，但睇外观，「大」喺以吞拿鱼蓉、甜虾、蟹籽、黑鱼籽所组成，「井」则以火炙带子、海胆、葱花组成，而「町」就用三文鱼蓉、牛油果、吞拿鱼蓉、海胆、黑鱼籽组成，可谓配搭花心思。
唔止卖相做得精致，味道亦比一般寿司更富层次、多变，而且，做得小巧，可以一啖一件，完全将寿司嘅滋味一次过放晒入口慢慢交融。
卷物、军舰、手卷因为老友都点咗唔少寿司，所以，同样属饱肚嘅卷物、军舰、手卷就无再考虑叫。见到有啲人为食海胆就叫客海胆手卷却唔食啲饭，跑得山区多，见到啲山区小学生食嘅午饭，嘥嘢嘅事真喺做唔出。
炸物食完一轮刺身、寿司，喺轮到香口嘅炸物出场，8款炸物当然样样都想试啦，不过，大家近排都有啲热气，所以，点炸物就要适可而止。
榴梿炸弹喺小弟指定要点，炸得外层香脆，榴梿馅亦都无欺场；墨鱼软骨又唔喺净得啲软骨，都连带埋啲墨鱼肉，又几酥香好食；薯丝虾，哈哈，今日都点咗几多虾嘅菜式，依一款以薯丝包住海虾香炸，咬落外层卜卜脆，好有薯香，内里虾肉仍然爽爽哋，比想像中好食。
烧物9样烧物，同样喺乜都想试，但眼阔肚窄就要有啲取舍，故拣咗其中5款试试：塩烧牛舌、烧羊架、烧菠萝、烧鱼一夜干、塩烧海虾。
几款烧物都做得普普通通，牛舌较好，简单盐烧，已足以吊起牛舌套有嘅燥味；而羊架及海虾觉得喺烧过火，入口有啲干，反而菠萝烧得唔够耐，再热啲，浓缩啲，会更鲜甜；最麻麻喺条一夜干，鱼肉嘅肉味喺浓，但肉质保持唔到软嫩，师姐讲笑咁讲话好似食咸鱼。
天妇罗食日本嘢，又点可以无天妇罗呢，5款天妇罗都喺惯常见到嘅款式，所以，随意点少少，当睇睇佢哋嘅炸功如何！
虎虾天妇罗似乎喺心态上返本嘅必然之选，虎虾取货够大只，粉浆有少少厚，但可接受，至紧要唔会食到一口油；南瓜天妇罗亦喺心水之选，粉甜嘅南瓜做天妇罗真喺好适合；而冬菇天妇罗则较少食，以原只冬菇嚟做天妇罗，效果几好，脆口中有份软腍嘅弹牙感。
蒸焗菜式味噌焗蚝喺蒸焗类嘅官方超人气之选，当然要试，另一人气选带子北海烧亦都要试吓，焗薯角相信无乜特别啦，反而，嚟多客蟹肉蒸蛋啱我多啲。
味噌焗蚝算唔错，颇有蚝味，不过，焗一焗，只蚝好缩水，至少一次一人两客先试清当中嘅味道；带子北海烧喺加入沙律酱同芝士一齐焗，香喷喷，不过带子肉都喺细粒；都喺蟹肉蒸蛋得小弟欢心，蒸蛋做得蛋香滑溜，内里唔足有蟹肉，仲有冬菇，喺一般茶碗蒸嘅蟹肉版，自然多一份鲜甜味。
铁板料理如果够人多，真想试佢个铁板牛柳粒，不过，怕就算点一客多得滞食唔晒而嘥嘢，故6款铁板料理只点咗日式炒杂菌同牛油粟米，当食番多少少纤维质嘅嘢。
啲牛油粟米果然充满牛油香，而且，粟米粒甜到你唔信；至于炒杂菌，都喺啲鸡脾菇、秀珍菇、冬菇……之类大路杂菌炒埋一齐，健康素选。
一品料理食到家下，真喺九乘几饱，留肚俾甜品之前，计落都仲有少少虚位，一于点多一客一品料理试吓。几款一品料理中，两款锅物同蟹粥，相信好大份食唔落，清酒煮蚬按人头俾，应该喺稳阵嘅选择。
真好，果然俾个二人份量细细碗，可以试试又唔怕撑爆肚。蚬肉入口无沙，亦唔韧，带少少酒香，做得不俗。
汤 / 面拉面、乌冬当然都喜欢食啦，不过，去到放题，一来依一类嘢唔会做得特别出色，咁饱肚嘢就通常都放弃，二来，睇番佢哋嘅选择，似乎唔喺有咩特别，就更加唔会试啦。
甜品上文介绍过近入口有个自助区，多款甜品可以自由任取，全部都喺做得的的骰骰。小巧精致，当然唔可以同去大酒店食自助餐相比，但都叫有份心去制造，唔似喺「求求其其」。所以，数一数共有4款日式和果子、吉士泡芙、提拉米苏、纽约芝士饼、朱古力布朗尼、巨峰提子奶冻、北海道牛乳奶冻、抹茶奶冻。咁有心，小弟当然要支持吓，独占一碟甜点拼盘先。
日式和果子拣咗樱花同柨子，卖相几得架，味道亦唔差㖞，外皮软糯，又唔太黏牙，饀心又唔会死甜；件布朗尼好浓朱古力味，湿润挺实，内里虽无混入合桃碎，却有啲朱古力粒，唔错；北海道牛乳奶冻劲牛奶味，质感又软滑。吉士泡芙、纽约芝士饼不过不失，喺提拉米苏似件咖啡蛋糕多过一件意大利芝士饼，因为无酒香，蛋糕底只喺朱古力海绵蛋糕，非浸咗咖啡酒嘅饼底。
自由区边位仲放有一个雪柜仔，里面喺雪米糍同Fruttato Gelato，各试一粒，前者撞手神喺香芋味，啱晒我；后者其实晌一啲甜品店都遇过，当喺即开即用嘅雪糕球，虽然芝麻味极浓郁，但雪死晒，口感跟Gelato喺完全欠奉。
Movenpick雪糕、Dreyer’s雪糕批除咗任食甜品之外，每位客人仲加送一款极品享受嘅甜点，5拣1：Movenpick瑞士朱古力雪糕、士多啤梨雪糕、云呢嗱梦幻雪糕、Dreyer’s日本宇治抹茶黑糖迷你雪糕批及吕宋芒果迷你雪糕批。
师姐拣咗Movenpick瑞士朱古力雪糕，佢话朱古力好香水浓，雪糕入口软滑。小弟就喺黑糖粉丝，所以，拣Dreyer’s日本宇治抹茶黑糖迷你雪糕批，抹茶味真喺好幽香，不过，讲真，啲黑糖味就点食都唔多觉。
依家放题店开到成行成市，无他嘅，作为客人而言，俾两嚿半水就可以任饮任食，又刺身，又天妇罗……比起食自助餐平一大截，只要质素有番咁上下，就已经觉得回本。而作为餐厅，只紧要客多做旺个场，反正灯油火蜡、人工固定成本，有无客都要支出，多个客就多分收入，而且，放题多多少少属流水作业，货源成本又较易控制，唔似自助餐晚晚倒嘢食。今晚嚟到「大井町」，环境、食物质量都叫人称心满意，值得翻兜。
张贴
