潮福蒸氣石鍋 (已結業)

入冬之后都未食过同火锅有关的野，今日有缘之下黎左呢间粥底蒸气石锅。可能自己未食过的关系，所以好好奇成个过程系点。一黎见个侍应落左米落个锅度，再放个隔系上面，上面就摆海鲜，冚盖等蒸气蒸熟米同海鲜。蒸唔同野食要唔同时间，全程都有侍应计时睇住，啱哂我呢d唔识整野食的人。海鲜就每人指定四款，每人一份唔系任食。我拣左石蚝、元贝、蛏子同鲍鱼。蒸完出黎最好食的系蚝，因为蒸到蚝的鲜味，软硬适中，本身又够大只够哂肥，可惜的系只系个餐只系包一只，唔太够喉。鲍鱼佢系配虫草花，食落算鲜甜，只系太细只。系等待的同时有乳鸽同炖汤食住先。炖汤系姬松茸炖螺肉，鸡汤底。入面的料算多，大约半盅到。火侯都够，起码饮落鸡味算浓。食完海鲜之后，可以任点其他野食，提供的选择无一般火锅店咁多，较为好食的有牛肉片同「污槽鸡」。「污槽鸡」因为落左红酒同杞子，所以蒸出黎有淡淡的酒味，几惹味，食完之后个人都暖番唔少。食到最后先至食粥，即系一开头蒸果堆，我点左瑶柱鲜淮山粥。因为之前蒸完海鲜，佢地的精华索哂入d粥度，所以食落几鲜甜下。价钱方面可能略为高左少少，海鲜果度如果份量可以大少少，同埋其他任食的食物可以多少少选择就更好。