武士拉麵 (已結業)

其实系附近食晏已经留意到呢间拉面店，见都几多学生哥帮衬。所以收左工就决定过黎会一会佢。虽然呢度铺仔细细，但选择都算多，有成十款拉面可以拣，味道淡至浓逐级上。但因为晏昼𠮶餐嘅关系，所以拣左个师傅仔都推荐，清新口味啲嘅，蕃茄猪骨拉面$98，配多条蟹捧+$12。个拉面一上枱，必定系试左个汤先。汤头好决定拉面嘅好坏，呢度做得几好。我点嘅系偏淡嘅蕃茄汤底，咁样唔会抢左猪骨汤同埋叉烧嘅味道。微微酸甜味，几醒胃。呢度嘅蟹棒系有诚意嘅货色，一梳梳嘅效果同味道都唔错而面就同师傅仔讲嘅一样，粗面会有少少偏硬。配合啖汤底出黎嘅效果就啱啱好，可以吸多啲汤汁。溏心蛋就老左啲，蛋黄熟左少少。反而叉烧就啱啱好了，软熟得黎仍有咬口。虽然唔算入味，但保留到少少肉香。之后见佢个特制鱼油咁有信心推荐，就攞左啲黎试虽然写系俾鱼介面用嘅，但我觉得淡味嘅汤底都可以试下，因为佢呢个胡椒沟芝麻油嘅组合真系几香，有刺激味蕾嘅效果。最后追加左个姜蜜，再暖一暖身先离开以便抵抗今晚呢个气温急降嘅日子。