酥妃皇后 (蘇杭街)

营业中

休息中

酥妃皇后都算系我地口袋名单之一，开张时铺天盖地宣传，但九龙城店令我俩有啲却步，又闻说高峰期要排队排好耐呢。等到人地开到上环，我终于食到了。老实讲，我又唔觉得一个蛋挞要令到我即使好唔方便都要狗冲，食完亦都觉得冇乜理由要再试。上环店门面亮眼，玻璃窗展示左当日供应产品，蛋挞有原味、芝士、榴梿三款，此外亦有例如牛角酥、果味方酥等，定价$10-18。店内有个小企位，可以立食，摆放左清水、纸巾，几贴心。我地当然系即食。原味蛋挞 $10以蛋挞黎讲，都算系贵贵地，普通面包铺我谂都仲系卖紧几蚊个。闻说酥皮由人手制作，以368层酥皮作为亮点。当日蛋挞都出炉一段时间，温度暖就讲唔上。蛋挞都几坠手，size比一般嘅大只啲。但酥皮入口冇乜特别，又唔系香，又唔系好酥。蛋香亦系一般般，胜在滑溜。挞底软奶奶，很薄身，一拎上手已经散开，而且略油。唔觉得有传闻中讲得咁惊为天人，就好似屋企楼下随便一间面包店如果新鲜出炉都做到咁上下质素。