The Oyster House (已搬遷) 新店位置

Auntie M有事要同XO仔商讨，相约周四喺离二人公司唔远o既「The Oyster House」度食晏。蚝屋走西餐路线，正门拉趟式o既玻璃窗门半开，感觉轻松自然，难怪吸引到咁多外国人帮衬。 企喺门外有位身穿白色恤衫o既姨姨，除咗落力地向路人介绍餐厅o既午市套餐之外，客满时亦不忘招呼店内o既客人，小肥离开时仲见到佢落手洗埋杯添，见佢整个中午忙个不停却仍能笑脸迎人，真系非常难得 ！餐厅主打食蚝，相信随时散叫都有得食，但为迎合湾仔区打工仔o既口味同时间限制，午餐都有提供多款肉食及饭面套餐，包有汤或沙律、大多属意大利菜o既主菜、甜品及咖啡或茶，都几丰富。落好单，姨姨先送上两片暖暖o既香草餐包，清香轻盈。跟住上o既希腊沙律都好爽脆。小肥同auntie一样都系叫咗「白酒煮蚬扁意粉」（$118）作主菜，可能人客实在太多啦，所以等咗一阵先有得食，见我地睇咗几次表，姨姨仲自动走上前为食物迟迟未上而道歉，极之诚恳 。热辣辣o既「白酒煮蚬扁意粉」面条烟韧弹牙。蚬只鲜甜美味，碟上剩余o既蚬壳足以证明份量十足 ，要等都系值得o既。Auntie M胃口冇细佬咁大，决定放弃甜品，XO仔当然系唔会放过啦