籠太子點心專門店 (已結業)

东大街嘅笼太子之前食过觉得抵食，今晚再嚟帮衬，坐低叫咗佢哋嘅虾饺同烧卖，可以嗌两只一笼，份量啱啱好，二个人分，唔怕食太多，虾肉弹牙够新鲜。上汤鲜竹卷连汤上枱，鲜竹好吸味，索晒个汤汁，非常好味。不是炸两，肠粉皮包住炸脆及虾肉，落咗豉油入口仲好松脆。名酱善蒸凤爪，非常入味，荐底嘅濑粉，索咗汁都好入味。蒜蓉排骨，劲多蒜蓉，仲有少少姜同干葱，所以好惹味！雪山叉烧包，外皮非常之松软，加埋叉烧，甜甜咸咸组合几特别。最后叫咗个糯米鸡，份量非常之大，里面嘅鸡都系好滑，而且仲有粒鹌鹑蛋，两人差啲都食唔晒。整体味道不错，价钱公道，埋单$180算唔错，街坊嘅价钱，点心都系即叫即蒸，调味刚刚好，点心算各有特色。仲可以加埋自家特制嘅辣椒油，混入炸过的虾米及虾干，唔算太辣，辣味点到即止。