凱富菜館 (已結業)

我地几个老友，时不时借啲意约出嚟食饭，无他，人齐吹水开心最重要。大家有共识，丰俭由人，有时烛光晚餐，有时街坊饭堂，周围都食吓。其中一个老友住鲗鱼涌地铁站，佢话带我地去电车路附近食潮州菜。呢间舖装修好有怀旧feel, 雕花玻璃、清明上河图……好多熟客系街坊，当然包括我个朋友。我老友系潮州妹，见到啲海鲜即时两眼发光，心大心细之际，老细话今日返咗啲元朗乌头，极力推荐！盛情难却，就叫咗一条试吓。🔸️蒸元朗乌头有埋logo，原来系元朗乌头，本地出产，有信心兼够新鲜。我其中一个贤妻老友话，一向香港以元朗乌头至靓、至多黄油。佢话潮州人钟意食冻乌头， 洗干净连鳞一齐蒸，再摊冻食，所以有黄油系特别香同好味道！佢仲提我地要点啲普宁豆酱夹住食，咁样𠮶味更鲜! 谂唔到咁大条鱼，一啲都唔嚡口！🔸️煎蚝饼 潮菜必叫嘅例牌之一， 好多人钟意食佢嘅微脆烟韧， 送饭送粥一流。用料几足，啖啖蚝仔肉！🔸️ 糖醋双面黄 分量好大，名副其实嘅两面黄， 即系面嘅面同底，两面都煎到金黄色，脆脆口感。点少少陈醋加少少白糖， 提鲜惹味， 点住陈醋食，仲有助减油腻。难得朋友相聚，吃吃倾倾最开心！