清真惠記

营业中

休息中

尤记得儿时跟住婆婆去鹅颈桥还𩠌之后佢会带我上街市熟食档食早餐或午餐，记得惠记朝早有粥、油炸鬼、肠粉等广式早餐， 最当时最爱白粥+牛脷酥。 而午市会有广式烧腊同咖喱。事隔多年婆婆已离去但系佢带俾我嘅生活点滴同儿时嘅味道、情怀记忆尤新。星期六行过湾仔差不多一点， 想到好耐无去惠记食嘢一于去睇吓。上到去见到人头涌涌，同以前一样舖位无乜改动过， 自己揾位坐彽然后落order， 由于供应清真食物所以无叉烧或烧肉之类， 其他烧腊如烧鸭、油鸡、切鸡都有，仲有咖喱牛、羊，油菜、萝卜等。 两个人要咗例牌烧鸭、净濑粉、咖喱羊饭。烧鸭刚出炉皮脆肉嫩好juicy，淋上面无乜颜色个烧味汁增添美味，鸭腌得入味肚位置食到好多香料味，绝对唔失色于其他烧鹅名店。 咖喱羊碗头饭一大碟，羊连汁用小碗载满泻放喺饭上面，汁香浓里面有好多洋葱蓉、咖喱香料好惹味用嚟捞饭最正， 羊肉质唔鞋好淋滑有D连筋煮到好似牛筋咁好有胶质， 不知不觉食晒成碟饭。多年后再次帮趁惠记出品、味道保持水准不变，确实难得。