羅麥記 (已結業)

近期去开新都城上堂，就同同学女一致决定，每日试一间食店。记得当日既堂实在太闷太眼瞓既关系，所以就一定要揾一间有奶茶咖啡既餐厅食lunch。当日行过见到餐牌呢杯粒粒奶茶，大家就决定入去一试。如果单叫就$38，跟食物再叫特饮就只系加$18，杯奶茶一到，最吸引我既就系粒“红豆冰”，整粒红豆冰系用奶茶雪成粒状，当慢慢饮时，粒冰就会慢慢解冻，所以茶味并未因为冰量而减淡，食完碟面再饮番都仍然有好浓奶茶味，而且重系好滑添！当个个都叫捞丁捞面时，我就第一次见用腐乳来捞，爱试新口味既我，当时要一试。可惜‥‥‥腐乳味重左，就算捞开之后，个人觉得都系重左少少，而且面身煮得太“林”，再加上腐乳汁，无左面应有既弹性，好彩就系鸡扒入味嫩滑，带有腐乳味都系一个几特别既煮法。