港嘢茶檔 (已結業)

同同学放学之后落咗九龙城，行过见到呢间新开嘅。最初觉得有少少伏（自己一向都有少少惊呢啲改名改到不伦不类同埋装修扮到好怀旧嘅餐厅），但系同学话想入去试吓，同埋周围又冇咩想食嘅嘢，咁咪入去试吓啰。去嘅时候系下午茶，人唔算多，坐得OK舒服。攞起餐牌见到啲嘢都几怀旧，但系选择唔多，又有好多野已经卖晒，最后叫咗两杯冻奶茶、炸大肠、肠粉同埋炸鸡肶。冻奶茶唔差，几滑得来茶味都够香浓，算系高水准之作。但系自己饮惯甜野，觉得有少少淡（但对普通人来讲甜度应该算系适中）。炸鸡肶虽然外皮有少少干（应该系无可避免挂）但系里面都算有肉汁同埋几入味。沙律好味足料，比起出边食到嘅有过之无不及，酸酸甜甜配埋鸡肶几夹。肠粉叫做冇乜惊喜，算系一般食到嘅肠粉，但胜在比出边餐厅卖相更佳。全餐最好味嘅系炸大肠，大肠甘香得来冇乜餲味，口感酥脆，加上菠萝嘅酸甜中和返个肥腻感，令到佢香而不腻。加上而家唔系太多地方有得食炸大肠，下次来必食!!!服务算系一般餐厅应有嘅水准。价钱虽然偏高，但系考虑到食物质素同埋环境，我觉得算系几合理。食嘅时候听到隔离枱话晚饭嘅𠮶啲肉饼几好，下次落去九龙城嘅话可以再去试！