和花亭壽司 (已結業)

其实之前同朋友喺装修前嚟过次，食物评价唔错，就系环境比较差，今次终于等到佢装修完再试食。除咗环境大变身外，餐牌食物都大改。先嚟𠮶新推出嘅细海胆一板，价钱唔算贵，而且鲜香味美，完全唔会有怪味，性价比一流，必食！每次都会试嘅烧鲭鱼，依然保持高水准，无咩腥味。巨型带子寿司、剑鱼寿司，带子非常新鲜，湿润极具光泽，品质完胜！剑鱼比较少食，不过感觉都唔差。芥辣八爪鱼军舰，上台时紫菜仲脆，虽然都系腌制品，不过八爪鱼亦系新鲜货，唔觉佢放得耐，无咩好挑剔。和花亭特色食品之一嘅自家制厚烧玉子寿司，玉子比装修前更甜，蛋香更浓，依然系必叫之选！三文鱼手卷，虽然紫菜仲脆，不过饭团几松散，三文角质量只系一般，而且份量算少，有啲失望。最后试咗个甜品「柚子雪葩」，果汁浓度奇高，好有刨冰嘅感觉。整体嚟讲装修后环境、食物都好咗，如果食Lunch Set就更化算！