BABY K Bora Seafood (已結業)

为咗要为小姪儿购买比卡超，周一专登约同尖咀通契妹陪伴远赴K11湿平。买完野后，小肥契哥当然系好识做地请食晚饭啦，地点就好随意咁拣咗喺商场三楼o既「BABY K Bora Seafood」。西餐厅楼底高，面积宽广，左方为酒吧区域，右边则为用餐大堂。两口子被安排入座二至四人o既厚垫梳化卡位，高高在上，而且阔落舒适。可能见门外o既彩图餐牌及餐垫上都印有抢眼o既龙虾，有选择困难症o既契妹居然谂都唔洗谂，即决定点食「波士顿龙虾二人套餐」（$638）。哥哥仔话跟餐每人其实可点餐酒一杯，但适逢西历元宵一月十五日，佢就提议叫调酒师免费升级炮制两杯情人鸡尾酒我地叹。草莓玫瑰园：鸡尾酒混入咗Daiquiri、玫瑰露、冰沙、鲜奶、士多啤梨等，其鲜红色o既外表可谓热情如火，饮落却又清凉甜美，就像是爱在冷与热情之间，当真够哂剧情。盘边再以超甜o既士多啤梨玫瑰花点缀，美艳得黎极富诗意！黑松露野菌忌廉汤：以野菌打成蓉o既忌廉汤芳香轻盈。鹅肝凯撒沙律：沙律清新爽脆，配上外脆内软嫩o既鹅肝可谓成功升呢，掂呀！芝士海鲜意大利饭：热辣辣o既意大利饭湿润带甜，不过可能细佬因近期工作烦琐引致胃部有啲不适，食落就觉得有少少溜滞。