西環碼頭 (已結業)

西环人推介的餐厅朋友未嫁前住西环，嫁左就搬左过海，但同我地班中学同学聚旧，都系要返返西环😜。佢推介西环码头，食过几次，话质素几好。睇menu见到好多野想食，除左海鲜仲有好多小菜可以拣，最后都系由西环人发办，应该无错。朋友果然信得过，叫左半只芝麻鸡，佢话每次必点。只鸡有个鸡肉切成嘅鸡冠，有造型，望落醒神。鸡皮脆卜卜，好薄，芝麻香口，无肥脂肪，可以放心食(自我安慰mode)。鸡肉已经去骨，好嫩滑，仲有碟柚子酱可以点，好好味！龙皇泡脆饭都令人好满意！用热锅上枱，上枱后先倒一碗脆米落去捞，劲钟意啖啖都有脆米嘅口感！海鲜料都好足，有虾、蚬、蚌、鱿鱼，配埋粥，好鲜甜。侍应话黑松露酱烩豆腐系招牌菜，作为一个黑松露粉丝，一定要试下！豆腐石锅上，热辣辣，酱汁沸腾左好耐！有冬菇、秀珍菇同鸡脾菇一齐，配埋黑松露，好入味！豆腐好大块，好滑，整体都好好食！西环人果然无介绍错！