真鮨 (已結業)

呢条街有唔少唔同菜式嘅食肆，去"韩国街"好多时亦都会经过，呢日忽然发现有间唔错嘅小店，唔系好出名，但就比预期中好味。入门口先上几级楼梯，原来只系得约十张枱，我吔冇订枱，差啲冇位。好吸睛嘅餐具，好日本.....刺身，寿司，串烧，日式小食，天妇罗等各样日式食物都有，仲有多种原条鱼刺身，今次我吔就先试试寿司。三文鱼籽海胆寿司可以话系最多人点，原来真系要试，只睇个样已经好吸引，好满嘅三文鱼籽同海胆，超正！而其他寿司都好好味，特别要试呢度都出名嘅火炙系列，烧得啱啱好，唔太生唔太熟。串烧方面都有惊喜，烧鳗鱼比平时见嘅大串，好厚肉，烧完仲有唔少鳗鱼汁，唔会太干身。不过烧豆腐就唔系太啱口味，豆腐比较硬，上面有啲木鱼丝，汁唔多，颢得豆腐更干，唔易入口。又到我差不多每次日本菜都要试嘅烧玉子，呢度有原味，芝士鳗鱼，同埋明太子口味拣，今次拣咗芝士鳗鱼味，个样好靓，好足料咁。玉子好甜好香蛋味，夹住嘅芝士同鳗鱼唔多但啱啱好，唔会盖过玉子味，仲有少许汁淋系上面，再加上紫菜，好满足！最后仲有烧多春鱼，烧得好好，每条都好完整，又唔会太咸，赞！