燒味滷師 (富榮花園) (已結業)

「燒味滷師」又開咗新分店，今次開到嚟富榮花園，啱晒我，非常就腳，因為近排經常要嚟呢頭辦事，今日趁有空檔，就即刻過嚟斬料加餸。裝潢有別於市面嘅一般傳統燒臘店，櫥窗以全玻璃形式展示，感覺更乾淨衛生，加上店鋪保持一貫作風，經濟抵食，所以都吸引唔少街坊嚟幫襯。揀咗半隻鹽焗雞、一盒泰式鳳爪、燒鵝下庄 同 一條叉燒，咁多樣嘢加埋都只係二百零蚊，非常抵食。至尊燒鵝下庄 ($120)：燒鵝皮脆肉香，食落肉質好嫩滑，有肉汁得嚟更帶陣陣香料氣息。淋上燒鵝汁再點埋啲酸梅醬一齊食，味道一流！燒味佬叉燒 ($40)：叉燒水準亦唔錯，肥瘦度剛好，肉質一啲都唔柴，入口甜甜地，有好香濃嘅蜜味，用嚟送飯就最適合不過。另外呢盒客家鹽焗雞 ($35)  都好正，雖然今次只係買咗半隻，但其實份量都唔少。雞皮厚薄適中，雞肉鮮嫩有彈性，帶微微鹹香，點沙薑汁食，更加滋味。泰式鳳爪 ($32)：鳳爪爽口又大隻，食落好有咬口，墊底嘅泰式醋汁，味道亦調校得啱啱好，入口酸酸辣辣，非常醒胃，絕對值得一試。