影片
更多
2010-08-18
26 浏览
食完哩餐，9/8就要動身上重慶山區（工作關係）刻苦一星期，所以哩次和食．燒肉盛宴，等小弟嘆餐飽可以安心上路！先多謝OR同桐燒，安排是次盛宴試食會。你知OR有幾多會員架啦，中簽率真係唔慌會高，今次仲係得8個名額，所以，感謝OR市務部同事厚愛，無啦啦揀中小弟；而桐燒已貴為車呔人推介餐廳，感覺上都未必好有需要搞依類試食會哩做宣傳，所以，點都要多謝佢哋提供咁豐富嘅食物俾一眾食評家好好享受。主辦單位安排咗個一室銀、灰、黑配襯嘅貴賓房，都幾型格，不過就無咗和風嘅氣氛，而成個房鬆鬆動動都可以坐上12-14人，空間感十足。卒之人齊，係時候開飯喇！1. 橫濱麗人Drink Menu有多款非酒精特飲，都係以一堆日本地名而命名，如沖繩海濱、淺草少年…，大會就在飯前安排咗一人一杯迎賓特飲「橫濱麗人」，賣相幾好，橙黃色主系，最下面一抹艷紅，我反而覺得叫沖繩黃昏仲有多少少意境！味道幾OK架，因為除咗炎夏嘆杯凍飲外，飯前一杯酸酸甜雜果汁醒醒胃，準備迎接豐富和食。但晌度有個疑問，睇住個餐牌寫橫濱麗人係由新鮮士多啤梨、菠蘿、橙組成，但觀其貌嚐其味，點都覺得最底下個層係士多啤梨糖漿！？2. 麻醬蒟蒻海鮮沙律配襯沙律菜嘅材
先多謝OR同桐燒，安排是次盛宴試食會。你知OR有幾多會員架啦，中簽率真係唔慌會高，今次仲係得8個名額，所以，感謝OR市務部同事厚愛，無啦啦揀中小弟；而桐燒已貴為車呔人推介餐廳，感覺上都未必好有需要搞依類試食會哩做宣傳，所以，點都要多謝佢哋提供咁豐富嘅食物俾一眾食評家好好享受。
主辦單位安排咗個一室銀、灰、黑配襯嘅貴賓房，都幾型格，不過就無咗和風嘅氣氛，而成個房鬆鬆動動都可以坐上12-14人，空間感十足。卒之人齊，係時候開飯喇！
1. 橫濱麗人
Drink Menu有多款非酒精特飲，都係以一堆日本地名而命名，如沖繩海濱、淺草少年…，大會就在飯前安排咗一人一杯迎賓特飲「橫濱麗人」，賣相幾好，橙黃色主系，最下面一抹艷紅，我反而覺得叫沖繩黃昏仲有多少少意境！味道幾OK架，因為除咗炎夏嘆杯凍飲外，飯前一杯酸酸甜雜果汁醒醒胃，準備迎接豐富和食。但晌度有個疑問，睇住個餐牌寫橫濱麗人係由新鮮士多啤梨、菠蘿、橙組成，但觀其貌嚐其味，點都覺得最底下個層係士多啤梨糖漿！？
2. 麻醬蒟蒻海鮮沙律
配襯沙律菜嘅材料有車厘茄、蒟蒻、魚子、熟蝦、蟹肉、魷魚圈，其實單睇材料都幾有賣點，尤其用上蒟蒻做沙律，我都係第一次食。蒟蒻本身含豐富纖維素，熱量又低，因有膨脹力，進食後易有飽肚感，常做幫助減肥嘅食物，所以做沙律都適合，不過，要解決佢嘅味淡問題，日本人會用佢哩做刺身點味噌醬哩食；但今趟個芝麻醬就似乎做唔到應有效果，可能係佢個醬汁做得較薄身，除少部份沙律菜掛汁外，大部份醬汁溜晒落底，而所有海鮮材料都係後加放上面，所以，突出唔到和式風味。我反而比較覺得係師傅將醬汁撈沙律菜同蒟蒻時，做得「拿西」咗啲，只係「求期」淋一淋上去就算，因為如果醬汁、沙律菜、蒟蒻撈多幾吓，夠勻嘅話，就算唔掛汁都食落有醬汁味。仲有，個沙律跟得一隻叉，如果醒目嘅俾多隻羹，咁就好使D！
3. 創作壽司盛合
賣相甚有睇頭，以牡丹蝦伴墨魚籽壽司為首，半彎長形瓦碟載著9件壽司，其他仲有：芝士鰻魚伴魚籽、劍魚腩、拖羅伴魚籽、油甘魚、拖羅、魷魚伴青瓜片及墨魚籽、凡立貝、三文魚伴魚籽及金箔。因為講明係創作壽司，創意行頭，所以，賣相造型我都覺得好唔錯，尤其個魷魚壽司，但好睇唔好食係美中不足之處。9件壽司4個人分，我就只係試咗芝士鰻魚伴魚籽壽司、方形拖羅壽司，首先珍珠米煮得爛，已經有種出師未捷身先死嘅感覺，再者，其實鰻魚OK，但就算加片芝士覺得都無特別，雖然灸燒過，但凍咗都係變返普通片裝芝士，無咗芝士烘軟溶溶哋嘅感覺；另一個拖羅壽司，做到立方體，創意係覺得自己食咗件double拖羅壽司囉，一件壽司飯搭兩片拖羅。
4. 韓國秘製汁燒牛肋骨
輪到另一主打「燒肉」出場，先上牛肋骨，係用上美國安格斯牛肋骨最厚肉嘅部份，薄切再卷番埋，一客三件咁上枱，而韓式同日式燒肉嘅分別，在於前者以濃味醬汁醃肉奉上，而後者就以食原味為主，唔會多醃。而今次依個牛肋骨，係韓式做法，即係勁醃，不過就改用日本醬汁哩醃，分別有味醂、清酒、日本醬油，老實講，醃完個味都分唔出係韓定日，總之醬汁味道濃郁，正。為方便食用，侍應幫我哋將大大件嘅牛肋骨一開三或四，再哩網燒，好快有得食！肉味濃，但口感較韌，真係食到小弟咬牙切齒咁滯。
5. 澳洲黑毛和牛野菜盛
繼續燒燒燒！牛肋骨仲未燒完，再哩一份日式盛合，有澳洲M9級黑毛和牛肩胛肉、牛舌、本地鮮雞雞件、幾款日本野菜（冬菇、茄子、蕃薯、南瓜）。因為依輪係日式，食材完全無調味，所以大廚特別炮製一款點燒肉嘅醬汁，成份除日本醬油，還加入咗菠蘿汁、雪梨汁，若嫌味道會複雜，亦準備好即磨原粒黑椒同海鹽俾大家，悉隨尊便！M9級即係M9級，澳洲和牛齋睇樣油花密而分佈平均，略略放上網燒，轉色亦返再燒，唔點醬汁，加啲黑椒、海鹽，肉質柔軟又有油香，可惜每人分得唔多件；牛舌亦都唔錯，小弟都幾鍾意食牛舌，貪佢軟軟腍腍又有種韌勁，平時多數食燴牛脷嘅多，今次食燒嘅，一樣咁正，因為更香，少少濃位更有種碳火味，溫馨提示，多吃無益；雞件，味道普通，只屬不妨一試嘅選擇；日本野菜，食完肉食番多啲菜梗係好事，但4款野菜每款一件，認真唔夠大方，好彩我都配給到想食嘅燒南瓜，燒軟嘅南瓜特別粉香，南瓜味夠晒重，好味！
6. 牛油蘆筍炒野菌
話完唔夠菜食，就即上依客蘆筍炒野菌，簡單嘅一道菜，欣賞佢用鐵板上，保持熱辣。蘆筍炒得爽嫩，咬落無渣；野菌有茶樹菇同雞脾菇，都屬於較爽口嘅菇類，配牛油炒夠香味，如果改用橄欖油炒就更健康喇！
7. 雜錦天婦羅
話雜錦，不如叫海老天婦羅（因為全是炸蝦），另加多一件冬菇天婦羅伴碟。睇樣，有少少感到唔對板，因為粉漿望落好似好厚，完全遮蓋晒蝦身嘅肉息，無晒個種透薄感，尤其下端近頭位，粉漿最厚，成舊舊粉咁！咬落，外層「咔嚓」應聲裂開，証明仍夠脆口，係厚身咗，相信係即做，但唔知點解好似又唔係即哩，食落少咗熱辣辣嘅狀態，還好，蝦本身都幾大隻，啖啖蝦肉，又夠蝦味。
8. 野菜稻庭烏冬
烏冬都係日本名物，平時對食烏冬都無太大要求，亦好少去烏冬專門店度食，今日算係一試稻庭烏冬嘅真味！記得以前睇過雜誌介紹，烏冬分兩大類：讚歧、稻庭，前者麵條粗而方，價錢大眾化，有分新鮮即製、半熟（急凍）、全熟、乾烏冬；後者麵條扁而幼，昔為貴族美食，當然依家都算大眾化咗，一般都係一包包嘅乾烏冬（想詳細瞭解烏冬世界，可睇番飲食男女No.739，25/09/2009）。桐燒聲稱係用急凍稻庭烏冬，但回顧番以上資料，如果係急凍嘅，好似無乜理由係稻庭烏冬，況且，烏冬樣貌都似粗方多過扁幼，所以稍為覺得似係讚歧烏冬。姑勿論係邊隻，烏冬質感彈牙唔糊口，帶有少少韌勁，唔會一夾就斷，仲有食落滑不溜口！以石鍋上，長時間保持熱度，烏冬浸耐咗都無出現腍爛情況，果然質高呀！配菜只有冬菇同日本水菜，擺明係食烏冬為主，所以懶理配菜，只因水菜第一次接觸，小試一撮，爽甜清脆。
9. 海膽石燒飯
去到尾聲，仲有兩個飯，足以填滿肚內所有空位。先哩海膽石燒飯，珍珠米上有菠菜、甘筍、大豆芽、冬菇為伴，最上面就放有兩大片大連馬糞海膽。對海膽唔算好有興趣，可能將石燒鍋內所有材料撈均就咁食，所以覺得海膽味變得唔係好出，同埋想食飯焦嘅人有啲失望，因飯焦唔多，但今勻啲珍珠米比食壽司時嘅珍珠米好好多，飯粒粘粘又煙韌，其他配菜，都OK啦！
10. 蘆筍和牛石燒炒飯
我就為佢改名叫環保和牛炒飯，因為經理話啲和牛粒係晌做燒肉時，頭頭尾尾下欄位剩番落哩，用得唔好嘥，就用晒哩做依個炒飯喇；而飯則用泰國香米，有飯味兼較爽身，比珍珠米適合做炒飯，仲有埋蘆筍粒、甘筍粒，炒完落石鍋就上枱。飯粒確係炒得分明爽口，和牛粒亦唔少，充滿油香，不過都係好肥吓，不宜多食！
11. 日本雪糕
一起手侍應拎咗好多杯芝麻雪糕哩，以為指定甜品無得揀，唓，原來仲有綠茶味，結果有啲食家心繫綠茶雪糕，奈何芝麻雪糕已在口裡，我就無所謂，試咗芝麻雪糕，都覺得幾香濃，重奶味，仲見到幼細黑芝麻粒粒。算係飽餐後再帶哩點點涼快感！
飽食一餐之後，總要俾點回應，好嘅上文都讚過，要改善嘅就留番依家講：
1. 小弟稍有準備，叫做哩之前打印番個試食菜單。但點都好，主辦單位都應該提供當日試食菜單，因為一來讓食家們清楚知道當日所食菜式嘅詳情，二來多少都會加深對該食物嘅印象，再者，公關們可以利用個菜單哩打開大家個話題，兼介紹一下各道菜嘅賣點或特色。
2. 我諗哩試食嘅食家都唔係一眾呃飲呃食嘅人，食完返去都真係好有心寫食評，亦唔會話你請我食，我就寫到你天花龍鳳、宇宙最強。但有時唔係對個個菜系都好有認識，或好識欣賞，所以，當日餐廳有關職員坐一邊「圍威喂」，我哋三唔識七嘅食家又安排坐另一邊，只係我哋「圍威喂」咁研究同交流，缺少同餐廳方面嘅互動，只係間中得經理走出哩講幾句，公關方面有D不足。我心諗：你哋點解要搞試食？試食會為何物？
3. 適當時候要換碟，好似大家都一致認為食完沙律要換碟，以便接住食壽司，唔晒D壽司揩晒啲沙律嘅麻醬汁。
4. 相信都唔係個個都有試過食日式燒肉，況且，唔同肉類都有唔同燒烤時間，點都好，侍應係唔係都應該同食客簡單烤肉嘅技巧同所需時間呢？依方面似乎就做漏咗喇！抑或我哋猛影相，聽唔到呢？
5. 烤爐係採用底部抽風，抽風系統都算唔錯，食完都無話一頭煙嘅；不過遇有燒到會滴油嘅雞件，就唔係好夠力咁，一爐濃煙，雖未至於成個房都係，但都可以搞搞佢，以致做得更好。
6. 雖然主打係和食同燒肉，不過，臨尾嘅甜品真係好失色兼失分，日式甜品都甚出名，無論和果子、蛋糕、羊羹……等等，而且香港人都鍾意餐後加個甜品哩作結，但佢哋真係只得日本雪糕獨賣，甜品一欄可唔可以諗諗加多幾款呢？
桐燒在08年初開業，在今次試食會之前，桐燒已累積咗40多個食評，有一定參考價值。而以笑、OK、喊嘅評分分佈為22 vs 11 vs 8，雖然笑嘅多，但亦唔好忽略有11個只係話OK，仲要有8個叫喊添！若以車呔人推介餐廳哩講，我就覺得未夠名正言順喇，如要保持「推介餐廳」之銜，實在要好好改善現在嘅問題，如想摘星，就要更加努力啲，在服務、食材質素加大力度提升！否則，只不過係一間你有人有、人有你無嘅日式燒肉店。
张贴
