捌拾胡同 (已結業)

一向都好钟意食串烧。有日行街见到个易拉架已经心郁郁想试。今晚同朋友饮完野又好似未够饱就决定黎试下，当食宵夜。尖沙咀租贵，一个细细既铺位只有两张吧凳，主力做外卖。小妹个人黎讲系好钟意地踎野，坐系街边我觉得几有feel. 睇完一轮，叫左个花甲，羊架，鸡翼，五花腩同捞面。当时差唔多十点，仲有宵夜优惠，十蚊一串。坐喺度等嘢食嘅时候，睇咗佢哋贴出嚟嘅新闻报道同埋简介。呢间店由几个年轻人夹份开，有一间铺做到依家尖沙咀有分店。报道有提及佢哋好努力去学师，返大陆揾唔同嘅调味料，所以对佢哋都几大期望。可能因为期望太大，最后系有少少失望。出菜嘅速度系我始料不及咁快，我心谂烧烤边有可能会咁快搅得掂。一试就试得出系预先煮熟然后再加调味料烧两烧。成串都孜然粉同辣味之外，咬开外面既皮就会试到入面本身好淡，冇乜点腌过，亦都唔系由生烧到熟，无乜咬口。再加上坐系到个时不断听到微波炉响，个心真系一沉。个捞面我无试，但系朋友嘅评价系一般。我好欣赏年轻人有勇气创业，但系系起步初期既储客阶段都咁取巧，将来就好难撑得住，再加上尖沙咀嘅饮食业竞争咁大，我真系唔太乐观。