影片
更多
2023-02-13
1804 浏览
话说东涌 Sheraton 住一晚包餐饮，琴晚已经用咗一大截食自助餐，今日食埋个 lunch 就松人。瞓醒觉交完锁匙就直上喺顶楼嘅 Sunset Grill，可能闲日关系成间餐厅得几枱客，我被安排坐靠窗一张枱。餐厅一大卖点就系个海景，又唔系多人，有靠窗嘅枱都好应该。不过海景就有分等级嘅，始终中环尖咀一带嘅海景最正，东涌呢边烂溶溶咁就冇乜好睇。有人话睇飞机升降好有趣，唔明飞机升降有乜好睇，以前启德都睇唔少啦，𠮶啲仲更加有趣。未点餐之前睇吓有咩 cocktail 先。仔细研究之下拣咗 Honey Old Fashioned，系 bourbon base 嘅 cocktail，上面放一旧类似蜂巢形状嘅蜜糖味脆糖。我问个菲律宾籍侍应 Harry 点玩呢件嘢，应该等佢自己溶定直接拎起嚟食，佢话细细啖咬一吓再呷一啖酒咁样。又几得意，咁就啱，饮 cocktail 呢啲都系贪得意啫。到点餐时我想食羊扒，但 Harry 竟然话冇货，佢赖带位个同事冇话我知。有冇搞错，咁大间餐厅羊扒都冇，系咪冇钱找货数呀？事但啦，我又冇话要追究责任，边个唔记得讲唔系重点。冇羊就食牛啦，叫咗个 ribeye 五成熟。Harr
瞓醒觉交完锁匙就直上喺顶楼嘅 Sunset Grill，可能闲日关系成间餐厅得几枱客，我被安排坐靠窗一张枱。餐厅一大卖点就系个海景，又唔系多人，有靠窗嘅枱都好应该。不过海景就有分等级嘅，始终中环尖咀一带嘅海景最正，东涌呢边烂溶溶咁就冇乜好睇。有人话睇飞机升降好有趣，唔明飞机升降有乜好睇，以前启德都睇唔少啦，𠮶啲仲更加有趣。
未点餐之前睇吓有咩 cocktail 先。仔细研究之下拣咗 Honey Old Fashioned，系 bourbon base 嘅 cocktail，上面放一旧类似蜂巢形状嘅蜜糖味脆糖。我问个菲律宾籍侍应 Harry 点玩呢件嘢，应该等佢自己溶定直接拎起嚟食，佢话细细啖咬一吓再呷一啖酒咁样。又几得意，咁就啱，饮 cocktail 呢啲都系贪得意啫。
到点餐时我想食羊扒，但 Harry 竟然话冇货，佢赖带位个同事冇话我知。有冇搞错，咁大间餐厅羊扒都冇，系咪冇钱找货数呀？事但啦，我又冇话要追究责任，边个唔记得讲唔系重点。冇羊就食牛啦，叫咗个 ribeye 五成熟。Harry 问五成咁生？我话你认为唔好咩？佢话唔系，不过出嚟如果我嫌太生可以叫厨司再煎一煎。一于咁话啦。
我心谂，五成都话生咁奇？又唔系三成。我通常叫五成出到嚟都差唔多七成，如果叫七成就多数变九成。我谂系咪厨房备餐时会将啲牛扒煎定底面先，到有人叫再落镬煎热佢，所以五成难控制？唔知。
拣酱汁时见到有 chimichurri，未试过，问Harry 系咩嚟。佢话系南美发明嘅，厨司见南美人成日食肉，佢哋发明配搭肉嘅酱汁应该有佢道理，所以引入咗。系 olive oil 底加蔬菜同 herbs，唔辣。好，试吓佢。
到上枱时 Harry 见我曾经犹豫紧拣 chimichurri 定 blue cheese sauce，结果佢俾晒两样我。
块扒肉质几好，嫩滑有咬口，大部分都俾到五成我，系有一细边煎耐咗变咗7成，算啦，都收货啦。
如我所料，blue cheese 点肉太抢，点薯仔就十分夹。所以啲肉都系集中点 chimichurri，的确唔抢之余仲提升个肉味，记住佢先。
其实琴晚𠮶餐仲未饱完，又唔系太好甜品，叫杯咖啡消消腻刚刚好。
今餐埋单七百几。
整体嚟讲，间餐厅冇雷公咁远，海景冇睇头，服务一般，但价钱同市区中环湾仔尖沙咀睇齐，唔减吓价唔会拣佢。
29 浏览
0 赞好
0 留言
张贴
