喜來稀肉 (瓊華中心)

营业中

休息中

一直想食喜来稀肉好耐，今日终于约到闺蜜陪我食。餐厅入面环境都唔错，空间感十足，每枱都有独立抽油烟机，唔怕食到一身油烟味。门外张贴咗告示，系讲如何免费享用沙律吧嘅方法，都几搞笑。所讲嘅沙律吧其实系韩式泡菜沙律。既然任食，而且泡菜又有益，即刻夹一大盘返番埋位慢慢品尝。最钟意食韩烧烤炉边嘅鸡蛋，呢度预设咗纯鸡蛋同芝士鸡蛋，店员仲建议我哋可以自己加泡菜落去变泡菜蛋。最钟意佢无限追加，我哋都refill咗几次。朋友话唔想食太多肉，最后决定叫济州五花肉，系两大条五花腩。五花肉烧起上嚟味道更甘香，而且经过烧烤后嘅五花肉可以去除多余油脂，食起上嚟卜卜脆。除咗烧肉，我哋仲叫咗几款主食，海鲜泡菜饼铺满一只大圆碟，入面有好丰富嘅海鲜，而且味道都唔错，点埋佢嘅秘制酱汁就更好味。牛排骨汤上枱嘅时候热辣辣。牛排骨份量相当多，入面仲有大葱同粉丝，汤底带有胡椒香，都几醒胃。最后食埋个甜品，韩式雪花冰Bingsu系牛奶味嘅棉花冰，上面就洒上黄豆粉、谷物片、花生、麻糬粒、红豆蓉等，无论卖相同味道都攞满分，下次再嚟一定要encore。