茶木‧台式休閒餐廳 (又一城)

营业中

休息中

茶木相信无人未食过，但又一城分店比较特别，采用先付后取自助形式，所以免却加一服务费。茶餐非常抵食，$62包咗前菜、主菜、菜饭/米粉二择其一嘅主食同冷热同价餐饮。新竹米粉面质比一般米粉幼细，更能吸收汤汁，肉燥份量足，唔会太咸太油腻，可惜无咩辣味、唔够香。青瓜偏老，唔够新鲜爽口，主要靠醋吊味。一向觉得猪软骨以台式炆煮为美味之首，口感稔软入味，软骨软嫩弹滑，味道咸中带甜，惹味又下饭。反而旁边白萝卜无咩味，亦唔够新鲜，咬落老身起丝。特价加量土豆丝炸虾，$38有8件，炸得偏油；虾偏细只，厨师先裹上鱼肉望落大只啲，再包上土豆丝油炸，但有一半都炸得唔够松脆，鱼肉沟咗粉，口感好浆糊糊，越食越抑😖难怪要压价追量。