一糖 (屏山)

营业中

休息中

自从天水围开咗一糖，终于唔洗落元朗都有甜品食🤪🤪特别系近期呢种时不时落雨嘅日子，出去食嘢更加注重就唔就脚。记得初开业嘅时候只有室内廖廖几枱座位，依家扩充到室外车场范围，轮候时间大大删减；加上有瓦遮头同风扇，唔洗等位又唔怕热同淋雨。甜品种类多到成本相簿咁厚，中式、西式、特饮、时令水果、绵绵冰，基本上你谂到嘅都有。私心推荐椰皇炖蛋白❣️蛋白椰汁各占一半，比纯炖奶入口轻盈不腻，甜度适中、唔死甜；加上啖啖桃胶，滋润又养颜，啱哂女仔饮～椰壳上嘅椰子肉一刮就甩，真系可以食哂啲果肉🤟🏻日式芭菲虽然无日本正宗嘅多料，但雪糕、脆米、红豆、忌廉同啫喱几种不同口感层次嘅食材同样带嚟充分满足✨抹茶味偏淡香不甘涩，抹茶控可能会觉得唔够浓郁。心太软有多种口味选择，身为酒鬼当然系拣Bailey’s🙉但食落无咩酒味。心太软即叫即制，火候恰到好处外脆内软，配上面头带淡奶油香嘅轻忌廉，感觉比起配雪糕更合适；选用咗偏浓嘅苦甜朱古力，食落唔会太甜漏。窝夫中规中矩，可能摆碟耐咗嘅关系，上枱微温、唔够香脆；除咗加入砂糖煮过嘅苹果粒，仲有几片爽脆嘅苹果薄片同粟米片提升口感，都算几有心思。