金記冰室 (黃大仙中心南館) (裝修中)

日期：10月6日人数：2人来到重阳时节，当然要去登高啦。呢日就约咗个朋友行狮子山，出发之前就喺黄大仙食咗个早餐。由满目疮痍嘅地铁站出口行出嚟，就会见到呢间金记冰室。由于我哋觉得佢好似几有特色，所以就入咗去试下。我哋两个人都系叫咗猪润公仔面，火腿奄列，加一块多士嘅早餐。我就饮冻柠茶，朋友就例牌饮冻鸳鸯。猪膶公仔面都几有心思，首先汤底有少许麻油味，煮得腍度啱啱好，面底都算唔错，起码唔会吸晒啲汤，或者好快就腍晒。猪膶份量好少，但都有放姜丝，唔算hea。面上边仲有几粒杞子，感觉高档左少少，但其实无乜实际。火腿奄列同样份量都唔大，味道中规中矩，落少少盐吊起味道都可以接受。多士方面，面包几新鲜。加上应该系即刻烘，所以都好热。配埋牛油味道算唔错。冻柠茶正常水准，唔够大杯。环境方面，装修系冰室风格，座位亦都够大，干净卫生。餐厅地理位置方便。价钱方面，因为我叫咗冻饮要+$3，所以最后早餐埋单$45。个人觉得味道可以接受，但就唔太抵食。