MUM 日常野菜料理 (已結業)

朋友推荐嘅呢间素食店曾三度罢市，佢位于逸东酒店food hall，虽然𠮶度有十间八间舖，但唯独呢间大排长龙，相信自有其过人之处。客人可自由选择三或四项冷盘同热食，每客定食都配味增汤、麦茶同饭，亦可加钱转配有机豆乳或杏仁奶同乌冬。我地一行三人都试左唔少款式，样样都高质，摆盘亦好精致，下面会介绍我试𠮶几款。.南瓜薯饼:薯饼好厚身，塞满天然微甜嘅南瓜蓉，外皮酥脆，极推。.本菇茶碗蒸:蒸蛋吸收晒啲高汤，食到底都好滑，加埋本菇冇咁单调。.赤味噌田乐豆腐:豆腐同蒸蛋一样咁滑，赤味噌味道颇浓，就咁食有啲咸，用黎捞饭会好啲。.野菜天妇罗:有冬菇、莲藕同南瓜三款，炸浆薄身，冬菇炸完都唔干，外层有轻轻用盐调味。.姜葱汁煮茄子:茄子已去籽，唔会过淋，个汁好浓酱油味，送饭一流。.柚子醋渍番茄:呢个有惊喜，番茄冰过所以口感爽脆，柚子醋甜甜酸酸好清新，又唔会浓到掩盖晒番茄本身嘅味道。.味增汤有白萝卜、豆腐同海带，好足料，自家制嘅所以饮完冇口渴，个饭都唔系求其比个白饭你就算，可以拣香菇五谷杂炊饭或正气黄姜饭，色彩缤纷又健康。