麻辣妹 (已結業)

疫症好多人都留喺屋企，少去出去，但系咁样真系会生菇，今日休息都出旺角同朋友聚吓。的确街上真系比平时少好多人，感觉更好，起码唔会因人多挤逼而讨厌旺角。行过女人街，虽然大家都唔食得辣，唔知点解会揾咗间川菜餐厅坐低食嘢。餐厅只有一枱客人，我哋每人点咗一款粉面，另加两个小食。唔食得辣当然就全部走辣，连小食都可以拣唔辣，味道都唔错。我哋一边食嘢一边倾吓计，纾解吓前一排郁闷嘅生活。好钟意呢张性感女神梦露做图案嘅櫈。蒜泥白肉(走辣)，虽然话走辣，但系蒜都有啲辣，都可以接受，腩肉切得好薄，肉质唔鞋又唔会太淋。凉拌黄金皮蛋，好钟意食皮蛋嘅我以前食过一次呢款黄金皮蛋真系辣到顶唔顺，有得走辣点都要食。金黄嘅颜色好吸引，虽然系无技巧嘅小食，但系我喜欢。凉拌手工凉皮配鸡中翼，猪大肠。凉皮爽滑，鸡中翼够味无腌到松散，肠大肠入味多淋。热拌扭纹水晶粉配鱼腐，肥牛，猪肚。呢个蒜味重啲，水晶粉烟韧口感好，鱼腐只有两块系鱼蛋口感，肥牛都算多，猪肚系切丝，味道几好。猪骨浓汤红薯粉配牛筋，腩肉。汤底唔太浓味啱啱好，红薯粉软滑，牛筋够晒淋，腩肉瘦嘅位亦唔鞋。热饮+$6。冻饮+$8。