真台客 (已結業)

由於疫情關係，已經好耐無去過台灣旅行，梗係要趁放假把握機會，同老婆出門口食下台灣嘢!主食方面，我地叫咗個大雞排便當，原本跟飯，我地轉咗跟麵。呢塊雞排絕對大過我塊手掌。雞排肉質夠晒嫩滑，肉汁好飽滿，食埋雞皮好邪惡，十分滿足！雞排醃味應該係用咗五香粉同椒鹽，算係相當大路嘅調味。呢碗麵又唔錯喎，簡簡單單唔洗太多調味。另外，小食方面揀咗蚵仔麵線、台式蛋餅同埋貢丸湯，呢三樣小食都係平時去台灣旅行好鍾意食嘅小食。我本身麻麻地蚵仔麵線嘅質感，主力都係老婆食得多。蛋餅就係台式傳統經典早餐，以往去台灣旅行真係可以每一朝嘅早餐都係食佢，我地今次揀咗粟米做配料。貢丸湯都係我同老婆嘅至愛，可以話係又簡單又方便嘅一個台式小食！呢到有得任飲冬瓜茶(凍)同埋麥茶(熱)，咁啱老婆唔飲得凍嘢，咁就可以飲麥茶，抵食之餘又夠貼心，照顧晒唔同人需要! 總括嚟講，成餐飯唔會話有太多驚喜，不過由食品去到細節位都好有台灣風味，令到我地又更加掛住台灣喇。