力天冰室

营业中

休息中

今晚同朋友相约冰室食个便饭，去左位于何文田嘅 力天冰室。位置由旺角东站行过去都几近几就脚。餐厅有卡位，圆枱，都阔落舒服。食物方面，晚市餐品都好多元化，传统晚市小菜，煲类，仲有焗饭，意粉同扒餐，总有一款啱口味。我同朋友分别叫左沙嗲金菇粉丝肥牛煲，配红汤，加左杯热奶茶。另一个叫左焗白汁粟米鱼柳饭，要左杯红豆冰。沙嗲金菇粉丝肥牛煲 份量劲大份，调味适中，唔会过咸，非常足料。金菇粉丝加埋芽菜超级入味，又好有口感，肥牛份量适中，唔会太韧，好送饭。加埋其他配菜，三色椒，洋葱同菠萝，整体均匀。餐配嘅红汤，几惹味，比想像中辣少少，都好开胃。焗白汁粟米鱼柳饭卖相唔错，见到芝士份量都几多，有做到拉丝，鱼柳好大块，咬落都保持到薄脆。饭底好够热，系蛋炒饭底，干身，有蛋香味。白汁份量捞饭都啱啱好，唔错！红豆冰，红豆份量超级多，经典香甜口味。热奶茶，质地够滑，味道好浓。