峴港安南越南餐廳

营业中

休息中

认真谂吓，真系好耐好耐冇嚟过乐富食饭，虽然话细细个有住过喺乐富，但系对呢边嘅餐厅真系冇乜印象，好彩今日有同事带路，先至揾到一间咁出色嘅越南餐厅！呢间餐厅装修好特别，喺街道行其实已经觉得佢嘅门面好抢眼，入都系更加系觉得所有细节都系精心挑选过嘅，当然啦最紧要都系食物都十分之高质！首先要赞一赞，呢度真系好有仪式感，每叫一碗汤河，佢都系揾个好复古嘅水壶倒啲汤底出嚟，啲汤底仲要好浓郁，好清甜。岘港特级崩沙腩配手工河啲崩沙腩好好食，厚切咁样上，但系完全冇鞋！岘港骟牯牛三宝就有牛颈脊、牛坑腩、鲜牛丸，全部都好好味，但系呢一款我哋就要咗檬粉。我自己就比较钟意檬粉，因为觉得佢口感比较烟韧。小食方面就要咗个炸猪肉，炸得好酥脆，而且我好欣赏佢个酱汁，令到成件事冇咁油腻。最后都加点咗一个越式法包，好钟意佢哋嘅pate，加上系即叫即做，个包系烤得好香，呢个我都觉得系呢间餐厅嘅必点item。饮品方面就要咗passion fruit味嘅百子茶同香茅青柠soda，百子茶用嚟打卡一流！当然两杯都唔会过甜，几清新，够refreshing。