榮少喇沙 (已結業)

要讲屯门嘅美食真系点试都试唔晒，今次经朋友介绍嚟咗屯门呢间荣少喇沙。为咗试佢哋更多嘅𩠌，珍宝喇沙就啱晒，有齐猪软骨、龙虾丸、肥牛、鱼片、鱼蛋、墨鱼丸、豆卜同鸡蛋。汤底除咗喇沙汤底，系可以拣芫茜鱼汤同鱼汤嘅，我建议第一次食当然系拣招牌喇沙汤底，面底方面竟然有双拼可以选择，我就叫左油面加米粉，汤底椰香浓郁色水十足，饮一啖完全系开晒胃，𩠌料面料份量十足，豆卜吸晒啲浓汤十分juicy，整体嚟讲十分高质！另外我哋仲嗌咗小食拼盘，呢个完全系十分惊喜！新鲜炸起即刻上碟嘅鸡翼、越南春卷同虾饼，越南春卷系我呢一味嘅最爱，入面有一片香叶令味道提升，连虾尾都系炸到脆卜卜！鸡翼亦系水准以上，完全锁住所有肉汁。整体来讲绝对系难以置信性价比高嘅一餐，钟意喇沙嘅绝对要试！