熊拉麵 (白加士街)

营业中

休息中

同大部分拉面店一样，冇得预约，要walk-in排队，位置喺内街，排队𠮶阵都比较焗，好在拉面店流转得快，唔使等好耐，店外有櫈可以比等候嘅客人使用。店面有一张L形吧枱同一张长方大枱，厨房开放式设计，每个间隔都有冰水自己斟。自己拣选拉面种类、硬度、配料（走葱、走木耳、走肉）我谂应该唔会有人走肉啩😆，值得一提系叉烧种类都有得拣：梅头瘦叉烧、火炙肥叉烧、角切叉烧粒。赤熊拉面汤比较杰身，可以挂晒系每一啖面，食落都好浓郁，食开小辣嘅我觉得辣度都接受到，本身面系冇跟溏心蛋，蛋系另外加，拉面同溏心蛋绝配，溏心蛋唔错，浸得入味唔会太咸，味道啱啱好，而且原只上唔会比个汤浸熟个蛋黄。鱼介熊拉面同样汤底都系比较杰身，汤面有层油，我估应该系精华黎😂？虽然有好多人推介，不过就觉得偏咸咗小小，唔系好食得出鱼介味，适合重口味人士，两款拉面都拣咗火炙肥叉烧，叉烧好食，一层肥肉一层瘦肉，烧到个面脆身，另外，枱面有放几款配料比客人自己添加，剩系试咗辣芽菜，连埋面食中和返啲油腻感，印象中仲有姜，不过就冇试到。芝士鱼肉条大推！好好食，鱼肉弹牙，有啲似鱼蛋，带有小小甜味，芝士够流心，两个人食每人两件都嫌有啲唔够喉。